2025 жылдың бірінші жартыжылдығында Қазақстанда жедел медициналық көмек қызметі 4 млн-нан астам шақыртуға қызмет көрсетті, табысты реанимация көрсеткіші 60,1%-ға дейін өсті, бірқатар өңірлерде бұл көрсеткіш 70%-дан асады, Абай облысында 90%-ға жетеді, деп мәлімдейді ҚР Денсаулық сақтау министрлігінің баспасөз қызметі.
Кеш орындалған шақыртулардың үлесі өткен жылмен салыстырғанда екі есеге жуық – 4,3%-дан 2,6%-ға дейін төмендеді.
«Инсульт және инфаркт сияқты өмірге қауіп төндіретін жағдайларда шұғыл көмек барған сайын жедел көрсетілуде. Қалалардағы инсультпен ауыратын науқастардың 98%-ға жуығы алғашқы 40 минут ішінде – өмірді сақтау және функцияларды қалпына келтіру үшін маңызды «алтын сағат» шегінде мамандандырылған орталықтарға жеткізілді. Сондай-ақ, бригадалар жедел миокард инфарктісімен 14 мыңнан астам шақыруға қызмет көрсетті», – деп атап өтті Денсаулық сақтау министрлігі.
Өтініштердің негізгі себептері: тыныс алу ағзаларының аурулары, жүрек-қан тамырлары және неврологиялық аурулар, жарақаттар, улану, инфекциялық және акушерлік жағдайлар.
Ел бойынша шұғыл қызметтің жұмысын 1 579 көшпелі бригада қамтамасыз етеді, оның ішінде қалаларда 979 бригада, ауылдық жерлерде 600 бригада жұмыс істейді. Қосымша емханалардың жанынан шұғыл 3-4-санаттағы шақыртуларға қызмет көрсету үшін 882 бригада ұйымдастырылды.
Қызметтің кадрлармен қамтылуы 86,5%-ды құрайды. Дәрігерлер саны көбеюде -олардың үлесі 77,4%-ға дейін өсті.
Жедел жәрдем паркінде 2 469 көлік бар. Жарты жылдың ішінде өңірлерге, оның ішінде МЖӘ және лизинг тетіктері арқылы 84 жаңа автомобиль түсті.
Шұғыл (1-ші) санат бойынша шақыртуға келудің орташа уақыты-8,8 минут. Шұғыл емес шақыртулар үшін-12-ден 26 минутқа дейін. Бұл стандарттарға сәйкес келеді және жоғары жүктеме жағдайында қызметтің тұрақты жұмысын көрсетеді.
ЖКО бойынша шақыртуларға ерекше назар аударылады. Мұндай өтініштер бірінші жартыжылдықта 20 мыңнан астам болды. Апат орнына келудің орташа уақыты-8 минут.
Денсаулық сақтау министрлігі жедел жәрдем қызметін дамыту және жаңғырту бойынша жүйелі жұмысты жалғастыруда.
