Атырау облысындағы «Мұқыр – Құлсары» автожолының бір бөлігінде топырақты тұрақтандыратын «QSmart – S» қоспасын қолдану басталды. «ҚазжолҒЗИ» (Қазақстан жол ғылыми-зерттеу институты) ғалымдарының инновациялық әзірлемесі әлсіз әрі тұрақсыз топырақты нығайтуға арналған және жол жамылғысының деформациясы мен шөгуінің алдын алуға мүмкіндік бермек.
Бұған дейін бұл қоспа Қазақстанның әртүрлі климаттық аймақтарында орналасқан екі пилоттық нысанда сынақтан өтіп, өз тиімділігін дәлелдеген. Институт мамандарының айтуынша, қазіргі уақытта қоспаларды унификациялау саясаты жүзеге асырылуда: әрбір құрам нақты бір топырақ түрі мен аймақтың ерекшеліктеріне бейімделіп, жетілдендірілуі қажет.
«Жұмыс жаңа материалдарды қолдануға арналған пилоттық жоба аясында жүргізілуде. Атырау облысындағы топырақтың түрлері аралас болып келеді, олардың ішінде сортаң, саздақ және құмдақ кездесетінін ескере отырып, қоспаны қолданбас бұрын Институт ғалымдары үш ай бойы учаскенің топырағын зерттеп, барлық қажетті химиялық талдаулар мен зертханалық сынақтарды жүргізді. «QSmart – S» қоспасын қолдану барысында нормативтердің, технологияның және сапаның сақталуын қамтамасыз ету үшін учаскеде біздің өкіліміз тұрақты түрде бақылау жүргізуде», – деп атап өтті «ҚазжолҒЗИ»-дың жол-құрылыс материалдары және жаңа технологиялар департаментінің директоры Қабдығалиева Мейрамгүл.
Қоспа оннан астам өнімді қамтитын «QSmart» желісіндегі отандық ғылыми әзірлемелер сериясына кіреді. Олардың қатарында құм бөлшектерін тұрақты әрі тығыз шөгінді құрылымға айналдыратын жаңа «QSmart – K» катализаторы да бар. Зерттеушілердің айтуынша, бұл технология Қазақстанда баламасы жоқ және топырақты пайдалану кезінде жерасты суларымен құмның шайылып кетуін болдырмай, негіздің шөгуінің алдын алады.
