Сауда базарларының жай-күйін бағалау үшін Сауда және интеграция министрлігінің өкілдері биыл ақпан, сәуір айларында базарларды аралау кестесін бекітті. Сапар барысында барлық өңірдің базарларын егжей-тегжей түгендеу жұмысы жүргізіледі
Бұл жұмыс әкімдіктер, мемлекеттік кірістер, төтенше жағдайлар, мемлекеттік сәулет-құрылыс бақылау және СЭС органдарының өкілдерімен бірлесіп жүргізіледі. Бұл туралы ҚР СИМ Сауда комитетінің төрағасы Айдар Әбілдабеков ОКҚ брифингінде хабарлады.
«Базарларды жаңғырту – бұл бірінші кезекте бизнестің әлеуметтік жауапкершілігі екенін ескеру қажет. Модернизиция тек сатып алушыларға ғана емес, сатушыларға да қолайлы және қауіпсіз жағдай жасайды. Әкімдіктер мен аумақтық сауда департаменттері жаңғыртуды уақытылы әрі сапалы жүргізу және модернизацияға кедергі келтіретін проблемалық мәселелерді жою бойынша жұмысты күшейтуі қажет», – деді ведомство өкілі.
2026 жылғы 1 қаңтардан бастап әкімшілік құқық бұзушылық туралы заңнамаға сәйкес белгіленген мерзімде жаңғыртуды қамтамасыз етпеген сауда базарларының иелерін әкімшілік жауапкершілікке тарту жоспарланған.
