Алматы облысында Мемлекет басшысының бастамасымен жүзеге асырылып жатқан «Жайлы мектеп» ұлттық жобасы аясында бірден үш жаңа мектептің салтанатты ашылуы өтті, бұл өңірдің жас тұрғындары үшін қуанышты жаңалық болды. Жаңа мектептерде 3200 бала заманауи жайлы жағдайда оқиды, олардың ата-аналары да білім сапасы үшін алаңдамайтын болды. Бұл туралы ҚР Ғылым және жоғары білім министрлігінің баспасөз қызметі мәлімдейді.
Биылғы оқу жылында облыстың 468 мектебі 365 404 оқушыны қабылдайды, бұл өткен жылмен салыстырғанда 14 173-ке артық. Бірінші сынып оқушылары санының өсуі ерекше назар аудартады – биыл мектепке 35 631 жас қазақстандық барады. Ашылу салтанатына ҚР Ғылым және жоғары білім министрі Саясат Нұрбек пен Алматы облысының әкімі Марат Сұлтанғазиев қатысты.
Министр Саясат Нұрбек білім беру саласындағы мамандарға сұраныстың артуына байланысты жыл сайын педагогикалық бағыттарға мемлекеттік гранттар саны артып келе жатқанын, 2029 жылға дейін 111 мыңнан астам педагог кадр даярлау жоспарланып отырғанын атап өтті.
«Мемлекет басшысының тапсырмасын орындау үшін педагогикалық жоғары оқу орындарын аккредиттеу стандарты және педагогикалық білім беруді жаңғырту тұжырымдамасы бекітілді. Педагогикалық бағыттарға гранттар саны 15 923-ке жетті, осы мамандықтарға түсуге қойылатын талаптар күшейтілді. Сонымен қатар жоғары оқу орындарының алдына түбегейлі жаңа деңгейде жұмыс істей алатын жаңа формациядағы мұғалімдерді даярлауды қамтамасыз ету, сондай-ақ оқу процесінің тәсілдерін қайта қарау міндеті қойылды», – деді Саясат Нұрбек.
-«Жайлы мектеп» ұлттық жобасы аясында біз оқу үшін қолайлы жағдайларды қамтамасыз ететін заманауи білім беру мекемелерін ашуды жалғастырамыз. Бүгін біз 3 жаңа мектеп ашамыз, бұл біздің өңірдегі білім беру сапасын жақсарту жөніндегі ауқымды бағдарламаның бір бөлігі ғана, – деп атап өтті Алматы облысының әкімі Марат Сұлтанғазиев.
Алматы облысының Қарасай ауданында «Жайлы мектеп» ұлттық жобасы аясында салынған Қошмамбет ауылында 1200 орындық жаңа мектеп ашылды. Екінші қыркүйекте Елтай ауылында 1200 орындық тағы бір жаңа мектептің салтанатты ашылуы өтеді. 2024 жылдың соңына қарай Алматы облысында «Жайлы мектеп» бағдарламасы бойынша тағы 24 мектепті пайдалануға беру жоспарлануда.
