Қазақстан 9 айда мұнай экспорттау жоспарын 100 пайыз орындады. Бұл туралы бүгін Үкімет отырысында ҚР Энергетика министрі Нұрлан Ноғаев айтты, деп хабарлайды Kaznovosti.kz
«Осы жылдың қаңтар-қыркүйек айларының қорытындысы бойынша мұнай және конденсат өндіру көлемі 64,7 млн тоннаны құрады. Бұл биылғы 9 ай жоспарының 100,5 пайызына тең. Оның ішінде, iрі жобалар бойынша көрсеткіштер жақсы. Теңізде аталған кезеңде 20,2 млн тонна мұнай өндірілді. Бұл – есепті айдың жоспарының 100,5 пайызы», – деді министр.
Оның айтуынша, Қашағанда мұнай өндіру көлемі 11,5 млн тоннаға жеткен. Яғни, қаңтар-қыркүйек айларының жоспары 100 пайыз орындалды.
Қарашығанақтың көрсеткіші 9 млн тоннаны құрап отыр. Биыл 9 ай жоспарымен салыстырғанда 102,2 пайыз болды.
«Осы 9 ай ішінде 52,2 млн тонна мұнай экспортталды. Яғни есепті мерзімнің жоспары 100 орындалды», – деді Нұрлан Ноғаев.
