Қазақстанда мемлекеттік қызметтердің сапасы мен қолжетімділігін арттыру мақсатында азаматтардың мемлекеттік органдармен өзара іс-қимылын жақсартуға бағытталған бес жаңа сервис енгізілді. Бұл туралы Үкімет отырысында «Азаматтарға арналған үкімет» КЕАҚ басқарма төрағасы Арман Кенжеғалиев мәлімдеді.
Бұл жаңалықтардың ішінде әр пайдаланушыға жеке қызмет көрсететін «жеке менеджер» бар.
Сондай-ақ шетел азаматтарын тіркеуге электрондық келісім сервисі енгізілді. Енді үй иелері жалға алушыларды уақытша тіркеу туралы SMS-хабарлама алады. Бұл шара тұрғын үй иесін ескертпей, шетелдіктерді тіркеуді болдырмайды.
Ақпараттық жүйелер жұмыс істемеген жағдайда пайдаланушылардан өтініштерді қабылдау үшін қосымша сервис әзірленді, бұл туындайтын проблемаларды жедел шешуді қамтамасыз етеді.
Маңызды жаңалықтардың бірі – дербес деректерге қол жеткізуді бақылау. Ол ХҚКО қызметкерлерінің азаматтардың жеке ақпаратына олардың келісімінсіз қол жеткізе алмайтындығына кепілдік береді.
Сондай-ақ, жылжымайтын мүлік иелерін барлық тіркеу әрекеттері туралы автоматты түрде хабардар ету сервисі енгізілді. Ол хабарламаларды электрондық үкімет порталындағы жеке кабинетке жіберетін болады. Өткен жылы 6 миллионнан астам хабарлама жіберілді.
-
-
-
-
-
-
