Әлеуметтік маңызы бар азық-түлік өнімдеріне шекті сауда үстемесін сақтауды бұзғаны үшін Small, Metro, Galmart сауда желілеріне қатысты ескертулер жіберілді. Бұл талаптар қайта бұзылған жағдайда бизнес субъектілеріне айыппұл салынады.
Әлеуметтік маңызы бар азық-түлік өнімдерінің бағасын тұрақтандыру мақсатында елорда әкімдігі «айналым тетігі» жобасы, тұрақтандыру қорын қалыптастыру, маусымдық жәрмеңкелер өткізу бойынша жұмыстар жүргізуде. Нұр-Сұлтан әкімдігінде сауда желілері, базарлар өкілдерімен, ауыл шаруашылығы өнімдерін өндірушілермен және т.б. кеңес өтті.
Әлеуметтік маңызы бар азық-түлік тауарларының бағасын тұрақтандыру үшін биыл «айналым тетігі» жобасы жалғасуда. Жобаға қатысушылардың саны кеңейтілді, сондай-ақ сауда желілеріне азық-түлік сатып алуға бөлінетін сома ұлғайтылды. 2020 және 2021 жылдары 3 млрд 700 млн теңге бөлінді. «Айналым тетігі» жобасына «Magnum», «Анвар», «Астықжан», «Кеңмарт», «Вкусмарт», «Аян», «Ақмол», «Шапағат», «Small», «Сарыарқа» сауда орындары және бірқатар дүкендер қатысады.
Бакалея, көкөніс, ет және сүт өнімдерін өндірушілермен және жеткізушілермен шарттар жасалды, оның ішінде шамамен 14 мың тоннаға көкөніс келісімшарты жасалды. Көкөніс, ұн, сиыр еті және т.б. сатып алу мәселесі пысықталып жатыр.
Сондай-ақ, ауылшаруашылық жәрмеңкелерін өткізу төмен бағаны ұстап тұруға және өнімді сатуға мүмкіндік береді. Республика өңірлерінің қатысуымен өтетін жәрмеңкелер 21 тамыздан басталып, қазан айының соңына дейін жалғасады. Өткен жәрмеңкелерде нарықтық бағадан төмен бағамен 2 мың тоннадан астам өнім сатылды.
Бұдан басқа, инвестициялар есебінен елордада қуаттылығы жылына 10 мың тонна өнімді құрайтын 3 көтерме-тарату орталығы мен екі жылыжай кешенінің құрылысы жүріліп жатыр. Сонымен қатар, қуаттылығы жылына 5 мың тонна нан-тоқаш комбинатын салу бойынша инвестициялық жоба іске асырылуда.
Өңірлік инвестициялық кеңес аясында жалпы құны 2,6 млрд теңге болатын өндірістік-тамақ кешенінің (сүт өңдеу зауыты, нан-тоқаш комбинаты, көкөніс қоймасы) құрылысына қолдау көрсетілді.
-
-
-
-
-
-
