Қазақстанда көктемгі егіс жұмыстары басталды. Енді ҚР Ауыл шаруашылығы министрлігі күн сайын еліміздің барлық өңірлеріндегі егіс науқаны барысын хабарлап отыратын болады. Көктемгі егіс жұмыстары кезінде қазақстандықтарға әр облыстың егіс алқаптары, қандай дақылдар егілетіндігі туралы, тұқымдардың көлемі, ауыл шаруашылығы техникасының дайындығы, минералдық тыңайтқыштардың жеткізілуі және т. б. ақпарат беріледі.
Алғашқы ақпаратты елімізде көктемгі егіс жұмыстары ерте басталған Түркістан облысы жайлы жариялаймыз. Биыл облыста 825 мың гектардан астам алқап егіледі
Бүгінде өңірде 159 мың гектар жерге өнім егілген.
Түркістан облысының Ауыл шаруашылығы басқармасының ақпараты бойынша, егіс алқаптарын әртараптандыру жоспарына сәйкес 2020 жылы өңірде картоп, көкөніс және бақша дақылдарын өсіру жоспарлануда. Бұл 122 мың гектарды құрап, өткен жылмен салыстырғанда 3 мың гектарға артық. Мал азығы дақылдарының алаңы 11,6 мың гектардан 212 мың гектарға дейін ұлғайтылды.
Майлы дақылдар алқаптары өткен жылдың деңгейінде қалды – 91 мың гектардан астам.
Дәнді-масақты дақылдарды себу алқабы 227 мыңға дейін, мақта егу алқабы 118 мыңға дейін қысқарды
Облыста шаруалар жаздық дақылдардың тұқымдарымен толық қамтамасыз етілген.
Көктемгі егіс жұмыстарына 17 мың трактордың 97 пайызы, 2,9 мың соқа, 430 бірлік топырақ тұндырғыш және 1,8 мың бірлік тұқым сепкіш дайын.
Биыл Түркістан облысына егіс науқанына 37 мың тонна арзандатылған отын бөлінді, оның 20 мың тоннасы үшін төлем жасалып фермерлерге жіберілді.
Өңірде 93,5 мың тонна минералды тыңайтқыштар сатып алуды субсидиялауға 3,5 млрд теңге бөлінді (2019 жылы – 3 млрд). «ҚазАзот» АҚ облысқа 27 мың тонна тыңайтқыш жеткізді, оның 7 мың тоннасы шаруаларға берілген.
«Аграрлық несие корпорациясы» АҚ Түркістан облысында егіс науқанын қаржыландыруға 5,3 млрд теңге бөлді. 112 фермер 1 млрд. теңге көлемінде жеңілдетілген несие алды.
Көктемгі егіс жұмыстарын уақытында жүргізу үшін адамдар мен техниканың кедергісіз жүруі қамтамасыз етіледі. Шымкент қаласы мен қаладағы және аудандағы блок-бекеттерге 24 минералды тыңайтқыштар жеткізушісі және 83 отын жеткізушісілердің автокөліктерінің тізімі жасалып, жауапты органдарға берілді.
Сонымен қатар, тез бұзылатын өнімдерді кедергісіз тасымалдау мақсатында фермерлердің автокөліктерін ««#BizBirgemiz Түркістан облысының азық-түлік өнімдері» деген логотип жапсыру ұйымдастырылды. Мұндай жапсырмалар фитосанитариялық және карантиндік сертификаттармен бірге берілетін болады.
