БастыСпорт

Бокстан әлем чемпионаты: Қазақстандық төрт жас спортшы финалға шықты

Польшаның Кельце қаласында өтіп жатқан жастар арасындағы әлем чемпионатында жартылай финалға шыққан қазақстандық бес боксшының төртеуі ақтық сынға жолдама алды, деп хабарлайды Қазақстан бокс федерациясы.

Әлем чемпионатында 49 келіде сынға түсіп жатқан Санжар Ташкенбай үндістандық Бишвамитр Чонгтамның осал тұсын тапты. Одан кейін 56 келіде Ерболат Сабыр ресейлік Алексей Шендрикті қапы қалдырды.

Сондай-ақ, 60 келідегі Елнұр Сүйінбай колумбиялық Джон Элина Оробио Синиестрді жеңсе, Сабыржан Аққалықов (64 келі) Анкит Нарвалдан басым түсті.

Ал Диас Молжігітов (75 келі) ресейлік Михаил Усовқа есе жіберіп, қола жүлдені қанағат тұтты.

Нәтижесінде енді қазақстандық төрт боксшы финалда бақ сынайды. Финал 22-23 сәуір күндеріне белгіленген.

Айта кетейік, қыздар арасында жартылай финалда жерлесіміз Жұлдыз Шаяхметова (60 келі) өзбекстандық Дильфуза Бекованы қапы қалдырып кетті. Ал Дана Дидай (75 келі) да өзбек бокшысы Сохиба Рузметованың осал тұсын тапты. Осылайша қыздар арасында екі қазақстандық спортшы енді финалда бақ сынайды.

Басқа жаңалықтар

Back to top button