Қазақстанның үздік теннисшілері Әйелдер теннисі қауымдастығының (WTA) жаңартылған рейтингінде өз орнын сақтап қалды. Бұл туралы Қазақстан теннис федерациясы хабарлады.
Қазақстанның бірінші ракеткасы Елена Рыбакина бұрынғыша 19-ыншы, сондай-ақ Юлия Путинцева 28-інші, Зарина Дияс 81-сатыда тұр. Ал Жібек Құламбаева, Екатерина Дмитриченко, Дарья Детковская және Галина Воскобоеваның рейтингтегі көрсеткіштері төмендеді, өйткені олар өткен аптада ұпайларын толықтыра алған жоқ.
Жұптық сында Г.Воскобоева 72-інші, А.Данилина 139-ыншы, Ю.Путинцева 187-орында қалды.
Ерлер арасында Кәсіпқой теннисшілер қауымдастығының (ATP) рейтингісінде бұрынғыша сербиялық Новак Джокович көш бастаса, испаниялық Рафаэль Надаль екінші, аустриялық Доминик Тим үшінші орында келеді.
Қазақстандықтардан Александр Бублик 45-інші, Михаил Кукушкин 89-орнында қалса, жарақатына байланысты жарыстардан тыс қалып жүрген Дмитрий Попко 165-тен 167-ге төмендеді.
Жұптық сында М.Кукушкин 76-сатыда қалса, Андрей Голубев 85-тен 88-ге, А.Бублик 88-ден 89-ға, Александр Недовесов 133-тен 134-ке сырғыды.
А.Недовесов бүгін Анталияда басталатын челленджер турнирінде (жүлде қоры – 44820 АҚШ доллары) жұптық сында бақ сынайды. Ол украиналық Денис Молчановпен бірге алғашқы айналымда америкалықтар Роберт Гэллоуэй мен Алекс Лоумен шеберлік байқасады.
