Жаңа жыл қарсаңында әскери қызметшілер Ақмола облысының Ақкөл қаласындағы балалар үйінің тәрбиеленушілеріне арнап сахналанған бағдарламамен нағыз мереке ұйымдастырды, деп хабарлайды Kaznovosti.kz Қорғаныс министрлігіне сілтеме жасап.
Шектеу шаралары мен санитариялық-эпидемиологиялық норма талаптары балалар үйіндегі тәрбиеленушілерге арнап мультфильм кейіпкерлерінің қатысуымен нағыз шоу-бағдарлама жасауға кедергі келтірмеді.
«Жаңа жыл қарсаңында және «30 игі іс» акциясы аясында «Жас сарбаз» республикалық қоғамдық бірлестігі, Нұр-Сұлтан қаласының әкімдігі, Әскери-патриоттық орталық балаларға сыйлықтар беруді ұйымдастырды, балалар үйі аумағын қардан тазартты. Осы іс-шараның мақсаты балаларға жылулық сыйлау, өскелең ұрпақтың бойына игілік іс жасауды дарыту», – деді «Жас сарбаз» әскери-патриоттық қозғалысының төрағасы капитан Мейірбек Меңдіғалиев.
Қорғаныс министрлігі мұқтаж жандарға және халықтың аз қамтылған тобына қол ұшын бере отырып, осы сынды акциялар мен іс-шараларға ұдайы қатысады. Бұл балалар ата-анасының қамқорлығынан айырылған. Пандемия кезінде балалар назардан тыс қалмас үшін Қарулы Күштердің әскери қызметшілері, қолдан келген мүмкіндікті жасайды.
