2020 жылдың қорытындысы бойынша Қазақстанның Агроөнеркәсіп кешені ЕАЭО елдері арасында ең жоғары өсім көрсетті. Бұл туралы халыққа есеп беру кездесуінде Ауыл шаруашылығы министрі Сапархан Омаров айтты.
«Өткен жылдың қорытындысы бойынша АӨК саласында барлық макрокөрсеткіштер бойынша өсім бар. Ауыл шаруашылығының жалпы өнімінің көлемі 5,7%-ға ұлғайып, 6,3 трлн теңгеге жетті. Бұл Еуразиялық экономикалық одақ елдері арасындағы ең үлкен өсім. Сонымен қатар, Қазақстанда азық-түлік өндірісі 4%-ға өсті», – деді министр.
Министрдің дерегі бойынша, ауыл шаруашылығының негізгі капиталына салынған инвестициялар ағыны 15%-ға, тамақ өнімдері өндірісіне салынған инвестиция 13,5%-ға ұлғайды. Нәтижесінде, АӨК инвестицияларының жалпы көлемі жоспардағыдан 154,2 млрд теңгеге асып, 677,2 млрд теңгені құрады.
«АӨК өндірісінің өсім көлемі қайта өңделген ауыл шаруашылығы өнімдері экспортының ұлғаюымен нақтыланды. Ол 2019 жылмен салыстырғанда 22%-ға өсіп, 1,3 млрд АҚШ долларын құрады. АӨК саласында жүргізіліп жатқан саясаттың тиімділігін британдық The Economist журналы өткізетін Азық-түлік қауіпсіздігінің жаһандық рейтингі де растады. Онда Қазақстан 2020 жылдың қорытындысы бойынша 16 позицияға көтеріліп, әлемнің 113 елінің арасынан 32-орынға ие болды», – деп атап өтті министр Сапархан Омаров.
Естеріңізге сала кетейік, карантин талаптарына байланысты министрдің халыққа есеп беру кездесуі онлайн-форматта өтуде. Іс-шараның тікелей көрсетілімі Youtube-арнасында және министрліктің Facebook әлеуметтік желісіндегі ресми парақшасында жүреді.
