«Бәйтерек» ұлттық басқарушы холдингі» АҚ-да жыл сайынғы директорлар кеңесі отырысының қарсаңында Стратегиялық жоспарлау комитетінің есеп беру кеңесі өтті. Отырыста холдинг пен оның еншілес ұйымдарының 2024 жылғы қызметінің негізгі нәтижелері жан-жақты талқыланды. Қаралған негізгі бағыттар – қаржылық көрсеткіштер, шағын және орта бизнесті (ШОБ) және агроөнеркәсіптік кешенді (АӨК) қолдау, тұрғын үй құрылысының дамуы. Сонымен қатар, инвестициялық саясатты жүзеге асыру, халықаралық ынтымақтастық, цифрландыру және клиенттердің қанағаттанушылығы мәселелері талқыланды.
2024 жылдың қорытындысы бойынша холдингтің таза пайдасы 416 млрд теңгені құраса, активтер мөлшері 14,1 трлн теңгеге жеткен. Ал активтердің рентабельділігі (ROA) 3% деңгейінде белгіленді. 2023 жылмен салыстырғанда, таза пайда 8 млрд теңгеге немесе 2%-ға артты, ал активтер мөлшері 4%-ға ұлғайды.
Сонымен қатар, цифрландыру арқылы «Бәйтерек» холдингі операциялық шығындарды 5%-ға қысқартты. Аталмыш шаралар жалпы экономикалық тиімділікті арттыруға ықпал етті. Бұдан бөлек, жаңа инвестициялық тетіктер мен қаржыландыру бағдарламаларын енгізу негізгі көрсеткіштердің тұрақты өсуін қамтамасыз етті.
Өнеркәсіп пен кәсіпкерлікті дамыту
2024 жылы Қазақстанның Даму Банкі 21 инвестициялық жобаны және 35 экспорттық операцияны қаржыландырды. Сонымен қатар, жалпы құны 1,46 трлн теңгені құрайтын 4 банктік кепілдік берілді. Жыл ішінде 28 инвестициялық нысан іске қосылды.
Бұдан бөлек, жабдықтарды жаңғырту және цифрлық технологияларға көшу бағдарламалары жүзеге асырылды. 500-ден астам шағын және орта бизнес кәсіпорны өндірістік қуатын жаңарту үшін қаржылай қолдау алды.
Агроөнеркәсіптік кешенді қолдау
Агробизнес – холдинг қызметінің басым бағыттарының бірі. 2024 жылы агроөнеркәсіптік кешенді қаржыландыру көлемі 1 трлн теңгеден асты. Бұл 17 740 ауыл шаруашылығы тауарын өндірушіге қолдау көрсетуге мүмкіндік берді.
Есептік кезеңде:
- 43 инвестициялық жоба 14,7 млрд теңгеге қаржыландырылып, заманауи астық қоймалары, сүт фермалары мен жылыжай кешендері салынды;
- Бұған дейін басталған 16 жобаға қосымша 4,9 млрд теңге бөлініп, олардың жаңғыртылуы мен іске қосылуы қамтамасыз етілді;
- 10,5 мыңнан астам ауыл шаруашылығы техникасы мен жабдықтарын сатып алуға қолдау көрсетілді;
- «Кең Дала» және «Кең Дала 2» бағдарламалары аясында 321,5 млрд теңге бөлініп, 2024 жылғы көктемгі егіс және егін жинау жұмыстары жүргізілді. Нәтижесінде 6,6 млн гектар ауыл шаруашылығы алқабы өңделді. Сондай-ақ 2025 жылғы көктемгі егіс жұмыстарына ерте қаржыландыру үшін 100 млрд теңге бағытталды.
Тұрғын үй құрылысын дамыту
Холдинг – Қазақстандағы тұрғын үй құрылысы бағдарламаларының негізгі операторы. 2024 жылы 70 мыңнан астам отбасы баспаналы болды.
Отбасы банк жалпы сомасы 1,3 трлн теңгеге ипотекалық несие берді (2023 жылы – 1,07 трлн теңге).
Экспортты және шикізаттық емес секторды қолдау
Холдинг шикізаттық емес секторды дамытуға басымдық беріп, көрсетілетін қолдау көлемін 2023 жылмен салыстырғанда 53%-ға ұлғайтты. Нәтижесінде, экспортқа бағытталған өндірістерді қаржыландырудың жалпы көлемі 1 трлн теңгеден асты.
Атап айтқанда:
- Қазақстанның Даму Банкі 35 экспорттаушыға 678,5 млрд теңге бөлді;
- Қазақстанның экспорттық-кредиттік агенттігі 96 экспорттаушыға 367,6 млрд теңге көлемінде сақтандыру және қаржылық қолдау көрсетті.
Инвестицияның басым бағыттары – металлургия (62%) және тамақ өнеркәсібі (22%). Бұл салалардың дамуы елдің экспорттық әлеуетін арттырып, экономиканың шикізаттық секторға тәуелділігін азайтуға ықпал етеді.
Жиын қорытындысы бойынша «Бәйтерек» холдингінің тұрақты өсімді және негізгі бағыттарды тиімді дамытуды жалғастырып жатқаны айтылды. 2025 жылы холдинг инвестициялық қызметті кеңейтуді, экспорттаушыларды қолдауды, агробизнесті дамытуды және жаңа қаржы құралдарын енгізуді жоспарлап отыр.
Сонымен қатар, цифрландыруды жалғастыру және халықаралық серіктестерді тарту көзделген. Бұл стратегиялық міндеттердің орындалуы «Бәйтерек» холдингін Қазақстан экономикасының жетекші даму институты ретінде одан әрі нығайтады.
-
-
-
-
-
-
