Бейжің–2022: Паралимпиада ойындарында ел намысын кімдер қорғайды?

Бейжің–2022 қысқы Паралимпиада ойындарына қатысатын  Қазақстан Республикасының құрама командасы аңықталды. 

XIII қысқы Паралимпиада ойындары 4 – 13 наурыз аралығында Қытай Халық Республикасының астанасы Бейжінде өтеді. Қазақстан тарапынан Ербол Хамитов, Александр Герлиц, Денис Петренко, Юрий Березин және Сергей Усольцев пара шаңғы және пара биатлон спорт түрлерінен қатысып, ел намысын қорғайды.

«Биылғы COVID-19 жағдайы спортшыларымыздың Пекин-2022 қысқы Паралимпиада ойындарына толыққанды қатысуына кедергі келтірді. Спортшылар Паралимпиада ойынадарына іріктеу жарыстарының көбісіне қатыса алмады.  Сондықтан Пекин-2022 ойындарына ұлттық құрама командамыз толық құрамымен бармайтын болды. Біздің паралимпиадашылар қысқы ойындарға барар жолда үлкен жұмыс атқарды, көп еңбек етті. Паралимпиада ойындарына жолдама алудың өзі үлкен жетістік.  Біздің паралимпиадашылардың жеңіске деген ұмтылысы жоғары, әлеуеті зор, өз күшіне сенімі берік», – деп атап өтті Ұлттық паралимпиада комитетінің президенті Қайрат Боранбаев.

Айта кетейік, Паралимпиада ойындарының ашылу салтанаты 4 наурыз күні Нұр-Сұлтан уақыты бойынша сағат 22.00 басталады. Еліміздің туын пара шаңғы спорт түрінен Әлем кубогінің қола жүлдегері, халықаралық дәрежедегі спорт шебері – Ербол Хамитов ұстап шығады.

«Пара шаңғыдан ұлттық құрама командасы қазір Алматы облысында Пекин-2022 қысқы ойындарына арналған оқу-жаттығу жиындарында. Жиын карантин режимінде өтуде. Covid-19 короновирус індетін таратпауға арналған барлық жағдайды жасалынды. Спортшыларды Паралимпиада ойындарына қатыстырып, елге жақсы оралу біздің басты мақсатымыз. Спортшылардың жағдайы жақсы, жарысқа дайын және жеңіске ұмтылысы мықты», – деді ұлттық құрама команданың бас жаттықтырушысы Василий Коломиец.

Пекин-2022 қысқы Паралимпиада ойындарында ҚР ұлттық құрама командасының өнер көрсету кестесі  (Нур-Султан уақыты бойынша)