Facebook-те COVID-19-ға қарсы вакциналанбаған балаларды мектепке жібермейді, ал вакцинадан бас тарту мектеп оқушыларын білім алу конституциялық құқығынан айыратыны туралы хабарлама тарады. Бұл жалған.
Хабарламада автор ҚР Денсаулық сақтау министрі Алексей Цойдың сөзіне сүйенеді.
Осы жылдың 19 шілдесінде «Хабар 24» телеарнасының эфирінде министр Қазақстанға Pfizer/BioNTech өндірген COVID-19-ға қарсы вакцинаны жеткізу жоспары жайлы баяндады. Бүгінгі таңда бұл препарат клиникалық сынақтардан өтіп, 12 жастан асқан жасөспірімдерді вакциналау үшін мақұлданған.
Алайда, бұл біздің елімізде 12 жастан асқан оқушыларға вакцинация міндетті болады және онсыз балалар мектепке бара алмай, кемсітушілікке ұшырайды дегеннің белгісі емес. Алексей Цой мұндай мәлімдеме жасаған жоқ.
Біріншіден, Pfizer/BioNTech вакцинасының алғашқы партиясы осы жылдың қазан айында, яғни оқу жылы басталғаннан кейін әкелінуі мүмкін. Екіншіден, денсаулық сақтау министрінің өзі хабарлағандай, балаларды COVID-19-ға қарсы вакцинациялау тек ерікті түрде ғана жүргізіледі және кәмелетке толмағандар ата-аналарының келісімімен ғана егіледі.
Демек, екпе салдырмаған балаларды білім алуға конституциялық құқығынан айырады деген қауесет негізсіз және шындыққа жанаспайды. Қазақстандық оқушылар вакциналау мәртебесіне қарамастан білім алатын болады.
-
-
-
-
-
-
