Қазақстанда жол саласы мамандарына арналған басты медиаресурс – «Jolshy – ҚазжолҒЗИ жаршысы» журналының шығуы қайта жанданды.
Бұл медиаресурс – саланың жаңа деңгейдегі ақпараттық алаңына айналды. Ол заманауи, түсінікті және ыңғайлы форматта әзірленген, бұл өз кезегінде қажетті ақпаратқа жылдам әрі оңай қол жеткізуге мүмкіндік береді. Мұнда ең маңызды деректер, салалық аналитикалық материалдар мен автожол саласының кәсіби қауымдастығы үшін өзекті шешімдер жинақталған.
Онда өзекті жаңалықтар, аналитикалық шолулар және сарапшылардың пікірлері жариялануда. Басылымда нормативтік-құқықтық құжаттарға енгізілген өзгерістер, озық технологиялар, отандық және шетелдік ғалымдардың соңғы жаңалықтары, сондай-ақ жол құрылысы саласындағы маңызды жетістіктер кеңінен қамтылады. Қазіргі уақытта журналдың алғашқы төрт саны жарық көрді. Алдағы уақытта ол жылына төрт рет шығарылып отырады. Журнал баспа және электронды нұсқада қолжетімді болады. Сонымен қатар, өзекті ақпаратты кеңінен тарату мақсатында әлеуметтік желілер арқылы да ақпараттық қолдау көрсетілуде.
Журналдың шығармашылық жетекшісі әрі жауапты шығарушысы – Қазақстан жол ғылыми-зерттеу институты (ҚазжолҒЗИ). Өткен жылдың соңғы саны толықтай Қазақстан жол ғылыми-зерттеу институтының 65 жылдық мерейтойына арналған «Болашақтың жолдары» Орталық Азия халықаралық конференциясына арналды.
«Біз Қазақстандағы жол саласының мамандары мен шетелдік әріптестеріміз арасында іскерлік байланыстарды нығайтуға және жол саласының барлық қатысушыларын ақпараттандыруға ұмтылудамыз. Біздің аудиториямыз – жол құрылысы, жол ғылымы, дистрибуция және саланың басқа да мамандары болып табылады», – деп атап өтті ҚазжолҒЗИ вице-президенті Ерік Дихамбайұлы.
2025 жылы журналды Қазақстан Республикасының Білім және Ғылым Министрлігі Ғылым және жоғары білім саласындағы сапаны қамтамасыз ету комитеті (КОКСНВО) ұсынған ғылыми басылымдар тізіміне енгізу жоспарлануда. Бұл қадам «ҚазжолҒЗИ Жаршысы» журналының мәртебесін арттыруға және оның ұлттық деңгейде дамуына маңызды үлес қосатын болады.
