78460 әскери бөлімінің әскери қызметшілері жауынгерлік үйлестіру ауданына жорық жасап, құрамына кешенді спутниктік аппараттық кешендер мен радиостанциялар кіретін далалық байланыс торабын орналастыруды жүзеге асырды.
Далалық жағдайда байланысшылар радио жаттығуларды өткізді, армия бөлімшелері мен жоғары штабтар арасында дыбыстық және файлдық хабарламалар жіберетін барлық байланыс түрін ұйымдастырды.
– Байланыс құралдарының көмегімен ақпаратты жедел беру бөлімшелерді басқаруды ұйымдастыру деңгейін арттырады. Сапалы, үздіксіз байланыс ұрыста жеңіске жету мүмкіндігін арттырады. Далалық сабақтарда жеке құрам жауынгерлік оқытудың алдыңғы кезеңдерінде алған білімдері мен дағдыларын іс жүзінде бекітті, – деді батальон командирінің тәрбие және идеологиялық жұмыс жөніндегі орынбасары майор Ербол Медеубеков.
Әскери байланысшыларды даярлаудың осы кезеңінде экипаждардың жеке құрамына штаттық аппараттық құралдарды үйретті. Экипаж дегеніміз белгілі бір учаскеде тапсырманы орындайтын жауынгерлік бөлім. Ал өткен сабақтар жоғары деңгейде ұйымдастырылды.
