Орта салмақта IBF және IBO тұжырымы бойынша әлем чемпионы Геннадий Головкин (41-1-1, 36 КО) өзінің келесі жекпе-жегіне дайындықты бастады, деп хабарлайды Prosports.kz.
Головкин АҚШ-та Джонатон Бэнкстің жетекшілігімен жаттыға бастады. Геннадий әлеуметтік желіде бапкермен бірге түскен суретін жариялап, оған мынадай жазба қосты:
«Жаттығу жиынына қайта оралып, өз командамды көргеніме қуаныштымын. Жақын арада Жапониядағы жекпе-жек уақыты белгілі болады деп үміттенемін. Дайындалып жатырмыз».
Естеріңізге сала кетейік, Головкиннің келесі қарсыласы WBA Super титулының иегері Риота Мурата (16-2, 13 КО) болуы керек. Олардың жекпе-жегі 2021 жылдың соңына жоспарланған болатын, бірақ Жапонияда карантин шаралары күшейтілуіне байланысты шегерілген. Енді жекпе-жек көктемде болады деген ақпарат шыққан еді.
