Қазақстан аумағында коронавирустың «үндістандық» штамм тіркелген жоқ. Бұл туралы Үкімет отырысында ҚР Денсаулық сақтау министрі Алексей Цой айтты.
«Біз жаңа мутацияларды анықтау мақсатында республика аумағында таралып жатқан коронавирустың штамдарына генетикалық зерттеулерді тұрақты негізде жүргізіп отырамыз. Мәселен, осы жылдың сәуір айында анықталған үлгілерді зерттеудің қорытындысында «британдық» штамның айналымда жүруі үлгілердің 30 пайызында анықталды. Ал республика аумағында «үнді» штамының айналымда болуы анықталған жоқ», – деді ҚР Денсаулық сақтау министрі.
Алексей Цойдың айтуынша, бүгінде Қазақстан індет жұқтыру көрсеткіші бойынша «сары аймақта» тұр. Бір аптада қауіпті індет жұқтырғандар саны 4000 науқасқа азайған. Елдегі инфекциялық ауруханаларда төсек орындары жүктемесі 33 процентке, жан сақтау бөлімдерінде 2 процентке төмендеді.
