Қорғаныс министрінің орынбасары генерал-лейтенант Тимур Дәндібаев армия генералы Сағадат Нұрмағамбетов атындағы Құрлық әскерлерінің Әскери институты мен Радиоэлектроника және байланыс Әскери-инженерлік институтына барды, деп хабарлайды Kaznovosti.kz министрліктің баспасөз қызметіне сілтеме жасап.
Жоғары оқу орындарының бастықтары генерал-майор Дулат Адырбеков пен Асқар Мұстабеков министрдің орынбасарына оқу орындарындағы жұмыстардың ағымдағы жағдайы туралы баяндады.
Сонымен қатар, профессорлық-оқытушылық құраммен кездесу өтті.
Жұмыс сапары барысында Тимур Дәндібаев санитарлық-эпидемиологиялық шектеулер жағдайындағы оқу жүйесін, оқу-материалдық базаның жай-күйін, оқу бағдарламаларының жүзеге асырылуын тексерді. Министрдің орынбасары оқу техникасы мен қару-жарақ үлгілерін, оқу-әдістемелік бөлмелердің, кафедралардың, зертханалардың, кітапханалардың жабдықтары мен жаттығу кешендерін қарады.
Кездесудің қорытындысы бойынша оқу жүйесінің мазмұнын одан әрі жетілдіру, әскери кадрларды даярлау сапасын арттыру жөнінде нұсқаулар берілді.
